aaiye aaj aap se kuchh raaz ki baaten karen

aa.iye aaj aap se kuchh raaz kī bāteñ kareñ

us hasīñ us kī nigāh-e-nāz kī bāteñ kareñ

vo ki jis ne muskurā ke kah diyā thā hāl-e-dil

us tabassum us hasīñ andāz kī bāteñ kareñ

thā vo bachpan yā javānī jab sunā thā nām-e-ishq

aaj phir un ajnabī alfāz kī bāteñ kareñ

yaad hai ab tak hameñ sahmā sā vo iz.hār-e-ishq

band āñkheñ kāñptī āvāz kī bāteñ kareñ

thak ga.e duniyā kī ḳhātir ḳhud ko de de kar fareb

aaj phir apne dil-e-nā-sāz kī bāteñ kareñ

hai bahut māyūs ye dil dekh kar anjām-e-ishq

phir bhī ham ai ham-nashīñ āġhāz kī bāteñ kareñ

hijr kī rut sahn-e-jism-o-jāñ se ruḳhsat ho ga.ī

ḳhushnumā mausam hai ab ham raaz kī bāteñ kareñ

aaiye aaj aap se kuchh raaz ki baaten karen

us hasin us ki nigah-e-naz ki baaten karen

wo ki jis ne muskura ke kah diya tha haal-e-dil

us tabassum us hasin andaz ki baaten karen

tha wo bachpan ya jawani jab suna tha nam-e-ishq

aaj phir un ajnabi alfaz ki baaten karen

yaad hai ab tak hamein sahma sa wo izhaar-e-ishq

band aankhen kanpti aawaz ki baaten karen

thak gae duniya ki KHatir KHud ko de de kar fareb

aaj phir apne dil-e-na-saz ki baaten karen

hai bahut mayus ye dil dekh kar anjam-e-ishq

phir bhi hum ai ham-nashin aaghaz ki baaten karen

hijr ki rut sahn-e-jism-o-jaan se ruKHsat ho gai

KHushnuma mausam hai ab hum raaz ki baaten karen