aaiye jalwa-e-didar ke dikhlane ko

aa.iye jalva-e-dīdār ke dikhlāne ko

phūñk de barq-e-tajallī mire kāshāne ko

dekhiye kaun sī jā yaar kā miltā hai pata

koī ka.abe ko chalā hai koī but-ḳhāne ko

terī furqat meñ tasavvur hai ye bedardī kā

ḳhvāb ham jānte haiñ niiñd ke aa jaane ko

ba.ad mere jo huā dasht meñ majnūñ kā guzar

ro diyā dekh ke ḳhālī mire vīrāne ko

kaam aa jaatī hai ham-bazmī bhī raushan dil kī

sham.a ham-rañg banā letī hai parvāne ko

aaj phir shahr ke kūche nazar aate haiñ udaas

kis taraf le ga.ī vahshat tire dīvāne ko

ai junūñ tañg huī vus.at-e-sahrā tujh se

ab kahāñ jaa.e tabī.at koī bahlāne ko

gul pe bulbul thā kahīñ sham.a pe parvāna thā

ham ne har rañg meñ dekhā tire parvāne ko

vā-shud-e-dil na huī ġhuncha-e-ḳhātir na khilā

kaun se baaġh meñ aa.e the havā khāne ko

maiñ ne jab vādī-e-ġhurbat meñ qadam rakkhā thā

duur tak yād-e-vatan aa.ī thī samjhāne ko

aaiye jalwa-e-didar ke dikhlane ko

phunk de barq-e-tajalli mere kashane ko

dekhiye kaun si ja yar ka milta hai pata

koi kabe ko chala hai koi but-KHane ko

teri furqat mein tasawwur hai ye bedardi ka

KHwab hum jaante hain nind ke aa jaane ko

baad mere jo hua dasht mein majnun ka guzar

ro diya dekh ke KHali mere virane ko

kaam aa jati hai ham-bazmi bhi raushan dil ki

shama ham-rang bana leti hai parwane ko

aaj phir shahr ke kuche nazar aate hain udas

kis taraf le gai wahshat tere diwane ko

ai junun tang hui wusat-e-sahra tujh se

ab kahan jae tabiat koi bahlane ko

gul pe bulbul tha kahin shama pe parwana tha

hum ne har rang mein dekha tere parwane ko

wa-shud-e-dil na hui ghuncha-e-KHatir na khila

kaun se bagh mein aae the hawa khane ko

main ne jab wadi-e-ghurbat mein qadam rakkha tha

dur tak yaad-e-watan aai thi samjhane ko