aaj bhi usne sar-e-bazm suni baat nahin

aaj bhī us ne sar-e-bazm sunī baat nahīñ

aur ye baat mire dost na.ī baat nahīñ

ġhair kā zikr kiyā aur kahā ye hañs kar

aap jo sochte haiñ aisī koī baat nahīñ

aap ke vāste maiñ jaan bhī de saktā huuñ

aap ke vāste lekin ye baḌī baat nahīñ

ham ga.e vaqt meñ yūsuf bhī kahe jaate rahe

ye ga.ī baat hai itnī bhī ga.ī baat nahīñ

log is vāste laḌte haiñ mire saath 'munīr'

maiñ jo har baat pe kahtā huuñ koī baat nahīñ

aaj bhi us ne sar-e-bazm suni baat nahin

aur ye baat mere dost nai baat nahin

ghair ka zikr kiya aur kaha ye hans kar

aap jo sochte hain aisi koi baat nahin

aap ke waste main jaan bhi de sakta hun

aap ke waste lekin ye baDi baat nahin

hum gae waqt mein yusuf bhi kahe jate rahe

ye gai baat hai itni bhi gai baat nahin

log is waste laDte hain mere sath 'munir'

main jo har baat pe kahta hun koi baat nahin