aaj ek marne wala kahta tha bekali mein

aaj ek marne vaalā kahtā thā bekalī meñ

hasrat mirī na niklī thoḌī sī zindagī meñ

taklīf bhī isī meñ ārām bhī isī meñ

donoñ ko ham ne dekhā do din kī zindagī meñ

qudrat ye kah rahī hai kuchh kar le zindagī meñ

fitrat shanās ho kar khoyā hai tū ḳhushī meñ

guzrā baḌe maze se iflās kā zamāna

piitā thā ḳhuun dil kā maiñ daur-e-muflisī meñ

gulshan jo ho gayā hai nazr-e-ḳhizāñ hamārā

pinhāñ thā rāz-e-hastī shāyad kalī kalī meñ

mutrib-navāz fitrat kahtī hai ahl-e-dil se

tār-e-nafas ko chheḌo naġhma hai bas isī meñ

saaqī ko bhuul jā.ūñ mutrib ko bhuul jā.ūñ

kuchh aur bhī izāfa ho merī be-ḳhudī meñ

bāġh-e-jahāñ se kyūñkar ahl-e-jahāñ na ḳhush hoñ

har gul meñ rang terā bū terī har kalī meñ

charḳh-e-barīñ pe fauran pī kar mirā pahuñchnā

sair-e-falak-numā thī har jām-e-sarmadī meñ

āvāz-e-nai ko sun kar be-ḳhud huā 'vafā' bhī

bhar dī sadā-e-dilkash ye kis ne bāñsurī meñ

aaj ek marne wala kahta tha bekali mein

hasrat meri na nikli thoDi si zindagi mein

taklif bhi isi mein aaram bhi isi mein

donon ko hum ne dekha do din ki zindagi mein

qudrat ye kah rahi hai kuchh kar le zindagi mein

fitrat shanas ho kar khoya hai tu KHushi mein

guzra baDe maze se iflas ka zamana

pita tha KHun dil ka main daur-e-muflisi mein

gulshan jo ho gaya hai nazr-e-KHizan hamara

pinhan tha raaz-e-hasti shayad kali kali mein

mutrib-nawaz fitrat kahti hai ahl-e-dil se

tar-e-nafas ko chheDo naghma hai bas isi mein

saqi ko bhul jaun mutrib ko bhul jaun

kuchh aur bhi izafa ho meri be-KHudi mein

bagh-e-jahan se kyunkar ahl-e-jahan na KHush hon

har gul mein rang tera bu teri har kali mein

charKH-e-barin pe fauran pi kar mera pahunchna

sair-e-falak-numa thi har jam-e-sarmadi mein

aawaz-e-nai ko sun kar be-KHud hua 'wafa' bhi

bhar di sada-e-dilkash ye kis ne bansuri mein