aaj hum sar-e-mahfil is qadar hanse yaro

aaj ham sar-e-mahfil is qadar hañse yaaro

ġham jo bhuul baiThe the yaad aa ga.e yaaro

chup haiñ qāfile vaale mutma.in haiñ rahbar bhī

dard bujh gayā yaaro ḳhvāb luT ga.e yaaro

tum the raunaq-e-mahfil har ḳhushī tumhārī thī

ham charāġh-e-mahfil the rāt-bhar jale yaaro

zindagī ke jo lamhe pyaar se sameTe the

vaqt ke bayābāñ meñ sab bikhar ga.e yaaro

'kaif' ghar ke bāhar to har taraf añdherā hai

apne apne ghar raushan sab ne kar liye yaaro

aaj hum sar-e-mahfil is qadar hanse yaro

gham jo bhul baiThe the yaad aa gae yaro

chup hain qafile wale mutmain hain rahbar bhi

dard bujh gaya yaro KHwab luT gae yaro

tum the raunaq-e-mahfil har KHushi tumhaari thi

hum charagh-e-mahfil the raat-bhar jale yaro

zindagi ke jo lamhe pyar se sameTe the

waqt ke bayaban mein sab bikhar gae yaro

'kaif' ghar ke bahar to har taraf andhera hai

apne apne ghar raushan sab ne kar liye yaro