aaj har chehre pe phaila hua ek Dar kyon hai

aaj har chehre pe phailā huā ik Dar kyoñ hai

ghar meñ rahte hue har aadmī be-ghar kyoñ hai

ik dahaktā huā laavā hai agarche andar

munjamid barf ke kohsār sā bāhar kyoñ hai

kyoñ chalī jaatī hai us ko mire hisse kī ḳhushī

us kā har dard mire dil ko mayassar kyoñ hai

log kahte haiñ mohabbat hai iram kā tohfa

aaj ye pyaar jahannum ke barābar kyoñ hai

kyoñ tire naam pe laḌte haiñ zamāne vaale

yā-ḳhudā chāroñ taraf ḳhauf kā manzar kyoñ hai

nargisī āñkhoñ meñ ik jhiil nahīñ sho.ale haiñ

marmarīñ hāthoñ meñ gul honā thā ḳhanjar kyoñ hai

be-gunāhī kī mirī jis meñ thī har dastāvez

bhiiḌ ke saath usī haath meñ patthar kyoñ hai

chāñd ko bāhoñ meñ lene kī lalak hai shāyad

aaj biphrā huā is darja samundar kyoñ hai

ḳhud ko jazbāt se aarī maiñ samajh baiThā thā

phir ye ehsās meñ ik dhuñdlā sā paikar kyoñ hai

aaj samjhā huuñ zamāne kī ravish hai kaisī

jo thā be-dāġh sar-e-dār vahī sar kyoñ hai

terī mai-rez nigāhī kā kahīñ naam nahīñ

tanz saaqī pe hai badnām ye sāġhar kyoñ hai

rang-o-bū meñ to hai vo rashk-e-chaman jān-e-chaman

apnī guftār meñ vo itnā sitamgar kyoñ hai

aaj har chehre pe phaila hua ek Dar kyon hai

ghar mein rahte hue har aadmi be-ghar kyon hai

ek dahakta hua lawa hai agarche andar

munjamid barf ke kohsar sa bahar kyon hai

kyon chali jati hai us ko mere hisse ki KHushi

us ka har dard mere dil ko mayassar kyon hai

log kahte hain mohabbat hai iram ka tohfa

aaj ye pyar jahannum ke barabar kyon hai

kyon tere nam pe laDte hain zamane wale

ya-KHuda chaaron taraf KHauf ka manzar kyon hai

nargisi aankhon mein ek jhil nahin shoale hain

marmarin hathon mein gul hona tha KHanjar kyon hai

be-gunahi ki meri jis mein thi har dastawez

bhiD ke sath usi hath mein patthar kyon hai

chand ko bahon mein lene ki lalak hai shayad

aaj biphra hua is darja samundar kyon hai

KHud ko jazbaat se aari main samajh baiTha tha

phir ye ehsas mein ek dhundla sa paikar kyon hai

aaj samjha hun zamane ki rawish hai kaisi

jo tha be-dagh sar-e-dar wahi sar kyon hai

teri mai-rez nigahi ka kahin nam nahin

tanz saqi pe hai badnam ye saghar kyon hai

rang-o-bu mein to hai wo rashk-e-chaman jaan-e-chaman

apni guftar mein wo itna sitamgar kyon hai