aaj jine ki kuchh ummid nazar aai hai

aaj jiine kī kuchh ummīd nazar aa.ī hai

muddatoñ ba.ad tirī rāhguzar aa.ī hai

zindagī kā koī ehsās hī baaqī na rahā

zindagī le ke mujhe aaj kidhar aa.ī hai

aap dekheñ to zarā ḳhūn-e-tamannā kī bahār

kitnī surḳhī mirī āñkhoñ meñ utar aa.ī hai

kis ke pairāhan-e-rañgīñ kī mahak hai is meñ

aaj ye bād-e-sabā ho ke kidhar aa.ī hai

tū ne ḳhud tark-e-mohabbat kī qasam khaa.ī thī

kyuuñ tirī aañkh mujhe dekh ke bhar aa.ī hai

ab kisī jalva-e-rañgīñ se mujhe kaam nahīñ

un kī tasvīr mire dil meñ utar aa.ī hai

is meñ kuchh un kī jafā.eñ bhī to shāmil haiñ 'shamīm'

bevafā.ī kī jo tohmat mire sar aa.ī hai

aaj jine ki kuchh ummid nazar aai hai

muddaton baad teri rahguzar aai hai

zindagi ka koi ehsas hi baqi na raha

zindagi le ke mujhe aaj kidhar aai hai

aap dekhen to zara KHun-e-tamanna ki bahaar

kitni surKHi meri aankhon mein utar aai hai

kis ke pairahan-e-rangin ki mahak hai is mein

aaj ye baad-e-saba ho ke kidhar aai hai

tu ne KHud tark-e-mohabbat ki qasam khai thi

kyun teri aankh mujhe dekh ke bhar aai hai

ab kisi jalwa-e-rangin se mujhe kaam nahin

un ki taswir mere dil mein utar aai hai

is mein kuchh un ki jafaen bhi to shamil hain 'shamim'

bewafai ki jo tohmat mere sar aai hai