aaj karna thi tawajjoh chaak-e-daman ki taraf

aaj karnā thī tavajjoh chāk-e-dāmāñ kī taraf

dhyān jā niklā magar ik rū-e-tābāñ kī taraf

jab havā ke naam pahuñchā āmad-e-shab kā payām

ek jhoñkā chal diyā sham-e-farozāñ kī taraf

ek chehra jagmagāyā hai sar-e-dasht-e-ḳhayāl

ek sho.ala uTh rahā hai dil se mizhgāñ kī taraf

ye bayābāñ aur us meñ chīḳhtī gaatī havā

un se dil bhar le to jā.ūñ rāh-e-āsāñ kī taraf

is tarah haa.il nahīñ hote kisī kī raah meñ

kyuuñ bhalā itnī tavajjoh ek mehmāñ kī taraf

ain mumkin hai ki tū sach bol kar zinda rahe

maiñ ishāra kar rahā huuñ ek imkāñ kī taraf

ik taqāzā bebasī kī raakh meñ dahkā huā

ik tazabzub kā safar inkār se haañ kī taraf

jis ke badle maut sadiyoñ kī basar karnā paḌe

zindagī kā qarz itnā to nahīñ jaañ kī taraf

aaj karna thi tawajjoh chaak-e-daman ki taraf

dhyan ja nikla magar ek ru-e-taban ki taraf

jab hawa ke nam pahuncha aamad-e-shab ka payam

ek jhonka chal diya sham-e-farozan ki taraf

ek chehra jagmagaya hai sar-e-dasht-e-KHayal

ek shoala uTh raha hai dil se mizhgan ki taraf

ye bayaban aur us mein chiKHti gati hawa

un se dil bhar le to jaun rah-e-asan ki taraf

is tarah hail nahin hote kisi ki rah mein

kyun bhala itni tawajjoh ek mehman ki taraf

ain mumkin hai ki tu sach bol kar zinda rahe

main ishaara kar raha hun ek imkan ki taraf

ek taqaza bebasi ki rakh mein dahka hua

ek tazabzub ka safar inkar se han ki taraf

jis ke badle maut sadiyon ki basar karna paDe

zindagi ka qarz itna to nahin jaan ki taraf