aaj mahfil mein nae sar se sanwar aaenge

aaj mahfil meñ na.e sar se sañvar ā.eñge

un ko mā'lūm hai kuchh ahl-e-nazar ā.eñge

rū-ba-rū yaar ke gar bār-e-digar jā.eñge

kar ke ham ek baḌā mā'rka sar ā.eñge

ye to dhamkī hai ki vo ġhair ke ghar jā.eñge

ham-nashīñ dekhnā hir-phir ke idhar ā.eñge

sabr karne ko jo kahte haiñ nahīñ aate haiñ

kyā mire zaḳhm-e-jigar aap hī bhar ā.eñge

kaun ummīd merī aap se puurī hogī

kaun armān mere aap se bar ā.eñge

laakh pardoñ meñ raheñ mujh se nihāñ roz-ba-roz

ḳhvāb meñ vo mujhe har shab ko nazar ā.eñge

dar se phir us but-e-pur-fan ke hamāre naale

saaf zāhir hai ki māyūs-e-asar ā.eñge

chashm-e-bīnā se jo dekheñge mirā parda-e-dil

ai masīhā ka.ī nāsūr nazar ā.eñge

koī kah do ki bas ab aur tavaqquf na kareñ

varna ham jī se guzarne pe utar ā.eñge

nā-tavānī se hamārī tujhe kyā terā sañbhāl

ham tire sāmne phir sīna-sipar ā.eñge

āzmā.eñge ġham-e-hijr kā ik aur ‘ilāj

kar ke sahrā meñ kuchh ayyām basar ā.eñge

rahbarī ḳhaak rah-e-'ishq meñ in se hogī

dil agar hazrat-e-'rahbar' kahīñ dhar ā.eñge

aaj mahfil mein nae sar se sanwar aaenge

un ko ma'lum hai kuchh ahl-e-nazar aaenge

ru-ba-ru yar ke gar bar-e-digar jaenge

kar ke hum ek baDa ma'rka sar aaenge

ye to dhamki hai ki wo ghair ke ghar jaenge

ham-nashin dekhna hir-phir ke idhar aaenge

sabr karne ko jo kahte hain nahin aate hain

kya mere zaKHm-e-jigar aap hi bhar aaenge

kaun ummid meri aap se puri hogi

kaun arman mere aap se bar aaenge

lakh pardon mein rahen mujh se nihan roz-ba-roz

KHwab mein wo mujhe har shab ko nazar aaenge

dar se phir us but-e-pur-fan ke hamare nale

saf zahir hai ki mayus-e-asar aaenge

chashm-e-bina se jo dekhenge mera parda-e-dil

ai masiha kai nasur nazar aaenge

koi kah do ki bas ab aur tawaqquf na karen

warna hum ji se guzarne pe utar aaenge

na-tawani se hamari tujhe kya tera sanbhaal

hum tere samne phir sina-sipar aaenge

aazmaenge gham-e-hijr ka ek aur ‘ilaj

kar ke sahra mein kuchh ayyam basar aaenge

rahbari KHak rah-e-'ishq mein in se hogi

dil agar hazrat-e-'rahbar' kahin dhar aaenge