aaj maiKHane ki wo baat nahin hai saqi

aaj maiḳhāne kī vo baat nahīñ hai saaqī

yā'nī ab din kī tarah raat nahīñ hai saaqī

jubba-o-qubba-o-dastār hai jin kā maz.hab

ham se aur un se mulāqāt nahīñ hai saaqī

'arsh se farsh talak dhuum machī hai jis kī

dūsrī aur koī zaat nahīñ hai saaqī

hurmat-e-mai kā hai us rind ke dāman pe lahū

jis ko pābandi-e-auqāt nahīñ hai saaqī

jo maza pīne-pilāne kā hai maiḳhāne meñ

chhup ke pī lene meñ vo baat nahīñ hai saaqī

ek ke jaam meñ ḳhuuñ ek ke sāġhar meñ sharāb

ye to ā.īn-e-musāvāt nahīñ hai saaqī

ham ko jaane meñ ta.ammul hai vo aane se rahe

ab koī shakl-e-mulāqāt nahīñ hai saaqī

jo bhī ho thoḌī bahut Dhaal de jaldī jaldī

sub.h hone ko hai ab raat nahīñ hai saaqī

mai-kada bhī vahī maikash bhī vahī mai bhī vahī

phir bhī aglī sī mudārāt nahīñ hai saaqī

shaiḳh kā haal hai kuchh sach bhī hai kuchh jhuuT bhī hai

ye nasab-nāma-e-sādāt nahīñ hai saaqī

yuuñ to maiḳhāne meñ sab jam' haiñ 'bismil' ke sivā

ik vahī mard-e-ḳharābāt nahīñ hai saaqī

aaj maiKHane ki wo baat nahin hai saqi

ya'ni ab din ki tarah raat nahin hai saqi

jubba-o-qubba-o-dastar hai jin ka mazhab

hum se aur un se mulaqat nahin hai saqi

'arsh se farsh talak dhum machi hai jis ki

dusri aur koi zat nahin hai saqi

hurmat-e-mai ka hai us rind ke daman pe lahu

jis ko pabandi-e-auqat nahin hai saqi

jo maza pine-pilane ka hai maiKHane mein

chhup ke pi lene mein wo baat nahin hai saqi

ek ke jam mein KHun ek ke saghar mein sharab

ye to aain-e-musawat nahin hai saqi

hum ko jaane mein tammul hai wo aane se rahe

ab koi shakl-e-mulaqat nahin hai saqi

jo bhi ho thoDi bahut Dhaal de jaldi jaldi

subh hone ko hai ab raat nahin hai saqi

mai-kada bhi wahi maikash bhi wahi mai bhi wahi

phir bhi agli si mudaraat nahin hai saqi

shaiKH ka haal hai kuchh sach bhi hai kuchh jhuT bhi hai

ye nasab-nama-e-sadat nahin hai saqi

yun to maiKHane mein sab jam' hain 'bismil' ke siwa

ek wahi mard-e-KHarabaat nahin hai saqi