aaj main aise hamd-zar mein tha

aaj maiñ aise hamd-zār meñ thā

ik tahayyur har ik nigār meñ thā

chhū ke jis gul ko log raakh hue

maiñ baqā kī usī qatār meñ thā

'azm thā qāfile ke qadmoñ meñ

dasht rauñdā huā ġhubār meñ thā

gesuoñ meñ bhī be-namak hī rahā

āb-e-shor aisā ābshār meñ thā

shahr pāgal thā shahr-yāroñ meñ

maiñ vahāñ kab kisī shumār meñ thā

fat.h duniyā ko kar rahā thā maiñ

aur yamīñ narġha-e-yasār meñ thā

ḳhalq thī dām-e-e'tibār meñ aur

shaah masrūf lūT-mār meñ thā

gardish-e-āsmāñ na thī ab ke

āsmāñ ḳhud hī gird-bār meñ thā

harf tafsīl ke ishāre the

kyā hunar us ke iḳhtisār meñ thā

'aks the us ke ā.ina-timsāl

she'r phir 'mīr' ke dayār meñ thā

yuuñ kaheñge kabhī 'nazīr' nazar

kuchh salīqa to ḳhāksār meñ thā

aaj main aise hamd-zar mein tha

ek tahayyur har ek nigar mein tha

chhu ke jis gul ko log rakh hue

main baqa ki usi qatar mein tha

'azm tha qafile ke qadmon mein

dasht raunda hua ghubar mein tha

gesuon mein bhi be-namak hi raha

aab-e-shor aisa aabshaar mein tha

shahr pagal tha shahr-yaron mein

main wahan kab kisi shumar mein tha

fath duniya ko kar raha tha main

aur yamin nargha-e-yasar mein tha

KHalq thi dam-e-e'tibar mein aur

shah masruf luT-mar mein tha

gardish-e-asman na thi ab ke

aasman KHud hi gird-bar mein tha

harf tafsil ke ishaare the

kya hunar us ke iKHtisar mein tha

'aks the us ke aaina-timsal

she'r phir 'mir' ke dayar mein tha

yun kahenge kabhi 'nazir' nazar

kuchh saliqa to KHaksar mein tha