aaj o nala sharar-bar ho tasir ke sath

aaj o naala sharar-bār ho tāsīr ke saath

ham ne maidān badā hai falak-e-pīr ke saath

dekhnā ye hai ki mai-ḳhāne se nikle kyūñ-kar

shaiḳh aa.e to baḌī izzat-o-tauqīr ke saath

aap ne de ke sazā aur baḌhā dī jur.at

ḳhauf-e-ta.azīr bhī dil se gayā ta.azīr ke saath

dil ko is darja tirī zulf se raġhbat kyoñ hai

kyoñ nahīñ us ko mire paañv kī zanjīr ke saath

saath hī zinda-dilī ke gayā dil bhī apnā

sham.a mahfil se ga.ī sham.a kī tanvīr ke saath

aks lene meñ uThā dete haiñ mujh ko ki nahīñ

merī tasvīr bhī khiñch jaa.e na tasvīr ke saath

dasht-e-vahshat meñ bagūloñ kā tamāshā aahā

naach un kā vo mire naġhma-e-zanjīr ke saath

jaane kis jaal meñ kam-baḳht rahā us meñ asiir

paḌ ga.ī dil meñ girah zulf-e-girah-gīr ke saath

pairvī hai usī marhūm kī 'nādir' varna

shā.erī kahte haiñ jis ko vo ga.ī 'mīr' ke saath

aaj o nala sharar-bar ho tasir ke sath

hum ne maidan bada hai falak-e-pir ke sath

dekhna ye hai ki mai-KHane se nikle kyun-kar

shaiKH aae to baDi izzat-o-tauqir ke sath

aap ne de ke saza aur baDha di jurat

KHauf-e-tazir bhi dil se gaya tazir ke sath

dil ko is darja teri zulf se raghbat kyon hai

kyon nahin us ko mere panw ki zanjir ke sath

sath hi zinda-dili ke gaya dil bhi apna

shama mahfil se gai shama ki tanwir ke sath

aks lene mein uTha dete hain mujh ko ki nahin

meri taswir bhi khinch jae na taswir ke sath

dasht-e-wahshat mein bagulon ka tamasha aaha

nach un ka wo mere naghma-e-zanjir ke sath

jaane kis jal mein kam-baKHt raha us mein asir

paD gai dil mein girah zulf-e-girah-gir ke sath

pairwi hai usi marhum ki 'nadir' warna

shaeri kahte hain jis ko wo gai 'mir' ke sath