aaj phir band-o-salasil ka KHayal aaya hai

aaj phir band-o-salāsil kā ḳhayāl aayā hai

zulf-e-pur-pech kā aur dil kā ḳhayāl aayā hai

phir bagūle haiñ ravāñ bahr-e-qadam-bosī-e-shauq

qais ko lailī-e-mahmil kā ḳhayāl aayā hai

phir mah-e-gumbad-e-gardāñ se lagī hai baazī

ham ko apne mah-e-kāmil kā ḳhayāl aayā hai

aaj phir aañkh se Tapkā hai koī qatra-e-ḳhūñ

ba.ad muddat hameñ phir dil kā ḳhayāl aayā hai

kārvāñ shauq kā hai paik-e-nazar se aage

duur se qurbat-e-manzil kā ḳhayāl aayā hai

dil ko us but se hai phir ajr-e-vafā kī ummīd

sa.ī-e-be-sūd meñ hāsil kā ḳhayāl aayā hai

bāñdh kar dashna-o-ḳhanjar jo nikal aa.e ho

aaj kyā phir kisī bismil kā ḳhayāl aayā hai

aaj phir band-o-salasil ka KHayal aaya hai

zulf-e-pur-pech ka aur dil ka KHayal aaya hai

phir bagule hain rawan bahr-e-qadam-bosi-e-shauq

qais ko laili-e-mahmil ka KHayal aaya hai

phir mah-e-gumbad-e-gardan se lagi hai bazi

hum ko apne mah-e-kaamil ka KHayal aaya hai

aaj phir aankh se Tapka hai koi qatra-e-KHun

baad muddat hamein phir dil ka KHayal aaya hai

karwan shauq ka hai paik-e-nazar se aage

dur se qurbat-e-manzil ka KHayal aaya hai

dil ko us but se hai phir ajr-e-wafa ki ummid

sai-e-be-sud mein hasil ka KHayal aaya hai

bandh kar dashna-o-KHanjar jo nikal aae ho

aaj kya phir kisi bismil ka KHayal aaya hai