aaj phir rang pe hai sham KHuda KHair kare

aaj phir rang pe hai shaam ḳhudā ḳhair kare

phir mire haath meñ hai jaam ḳhudā ḳhair kare

log kahte haiñ ki vo mujh pe meherbān haiñ phir

un ke hoñToñ pe mirā naam ḳhudā ḳhair kare

hai ye afvāh baḌe zor pe har mahfil meñ

un ko mujh se hai koī kaam ḳhudā ḳhair kare

phir rañge-hāth mujhe dard ne aa pakḌā hai

phir mohabbat kā hai ilzām ḳhudā ḳhair kare

lākhoñ tūfān ki jis dil meñ base rahte the

āj-kal hai vahāñ ārām ḳhudā ḳhair kare

jo mujhe dekh ke nazroñ ko churā lete the

un kī āñkhoñ meñ hai paiġhām ḳhudā ḳhair kare

jaane kyā soch ke us but ne ulaT dī hai naqāb

aur phir vo bhī sar-e-bām ḳhudā ḳhair kare

yuuñ to pahle bhī ka.ī dost daġhā dete the

ab to ye baat huī 'aam ḳhudā ḳhair kare

mere mā'sūm irādoñ ne dubāra 'rāhī'

un kā āñchal hai liyā thaam ḳhudā ḳhair kare

aaj phir rang pe hai sham KHuda KHair kare

phir mere hath mein hai jam KHuda KHair kare

log kahte hain ki wo mujh pe meherban hain phir

un ke honTon pe mera nam KHuda KHair kare

hai ye afwah baDe zor pe har mahfil mein

un ko mujh se hai koi kaam KHuda KHair kare

phir range-hath mujhe dard ne aa pakDa hai

phir mohabbat ka hai ilzam KHuda KHair kare

lakhon tufan ki jis dil mein base rahte the

aaj-kal hai wahan aaram KHuda KHair kare

jo mujhe dekh ke nazron ko chura lete the

un ki aankhon mein hai paigham KHuda KHair kare

jaane kya soch ke us but ne ulaT di hai naqab

aur phir wo bhi sar-e-baam KHuda KHair kare

yun to pahle bhi kai dost dagha dete the

ab to ye baat hui 'am KHuda KHair kare

mere ma'sum iradon ne dubara 'rahi'

un ka aanchal hai liya tham KHuda KHair kare