aaj phir sar-e-maqtal de ke KHud lahu humne

aaj phir sar-e-maqtal de ke ḳhud lahū ham ne

teġh-e-dast-e-qātil kī rakh lī aabrū ham ne

jān-e-ġhuncha-o-lāla rūh-e-rañg-o-bū ham ne

aap ko banāyā hai kitnā ḳhūb-rū ham ne

jab bhī lutf-e-sāqī meñ farq aate dekhā hai

baḌh ke toḌ Daale haiñ sāġhar-o-subū ham ne

bārhā zabānoñ par lag ga.ī hai pābandī

bārhā nigāhoñ se kī hai guftugū ham ne

rāh-e-shauq meñ aksar vo bhī vaqt aayā hai

jab kiyā hai hāthoñ se ḳhūn-e-ārzū ham ne

shahr ho bayābāñ ho daar ho ki zindāñ ho

naġhme zindagī hī ke gaa.e chār-sū ham ne

aaj phir sar-e-maqtal de ke KHud lahu hum ne

tegh-e-dast-e-qatil ki rakh li aabru hum ne

jaan-e-ghuncha-o-lala ruh-e-rang-o-bu hum ne

aap ko banaya hai kitna KHub-ru hum ne

jab bhi lutf-e-saqi mein farq aate dekha hai

baDh ke toD Dale hain saghar-o-subu hum ne

barha zabanon par lag gai hai pabandi

barha nigahon se ki hai guftugu hum ne

rah-e-shauq mein aksar wo bhi waqt aaya hai

jab kiya hai hathon se KHun-e-arzu hum ne

shahr ho bayaban ho dar ho ki zindan ho

naghme zindagi hi ke gae chaar-su hum ne