aaj shayad zindagi ka falsafa samjha hun main

aaj shāyad zindagī kā falsafa samjhā huuñ maiñ

huuñ zarūrat zindagī kī is liye zinda huuñ maiñ

hai mirī taḳhlīq meñ unsur baġhāvat kā koī

jis jagah pābandiyāñ thiiñ us jagah pahuñchā huuñ maiñ

ik ajab sā hai ta.alluq us ke mere darmiyāñ

aisā lagtā hai ki us kī zaat kā hissa huuñ maiñ

haiñ numāyāñ jis ke chehre par haqīqat ke nuqūsh

tere shahr-e-ḳhvāb meñ vo aadmī tanhā huuñ maiñ

chhā gayā huuñ ḳhauf ban kar apne hī a.asāb par

aur kabhī be-ḳhauf ho kar ḳhauf se niklā huuñ maiñ

haiñ zamīñ par har taraf mere hī qadmoñ ke nishāñ

roz-e-avval se hī 'sālim' koī āvāra huuñ maiñ

aaj shayad zindagi ka falsafa samjha hun main

hun zarurat zindagi ki is liye zinda hun main

hai meri taKHliq mein unsur baghawat ka koi

jis jagah pabandiyan thin us jagah pahuncha hun main

ek ajab sa hai talluq us ke mere darmiyan

aisa lagta hai ki us ki zat ka hissa hun main

hain numayan jis ke chehre par haqiqat ke nuqush

tere shahr-e-KHwab mein wo aadmi tanha hun main

chha gaya hun KHauf ban kar apne hi aasab par

aur kabhi be-KHauf ho kar KHauf se nikla hun main

hain zamin par har taraf mere hi qadmon ke nishan

roz-e-awwal se hi 'salim' koi aawara hun main