aaj tak jo na mere ashk-e-rawan tak pahunche

aaj tak jo na mire ashk-e-ravāñ tak pahuñche

ġhair mumkin hai ki vo dard-e-nihāñ tak pahuñche

haa.e tālib jo hue kākul-e-ḳhamdār ke ham

dekhiye aap hī ḳhud apne ziyāñ tak pahuñche

yaad karne pe tujhe aise bhī aate haiñ ḳhayāl

aaj tak jo na kabhī mere gumāñ tak pahuñche

kaash aisī ho atā quvvat-e-guftār mujhe

maiñ yahāñ sochūñ mirī baat vahāñ tak pahuñche

kū-e-jānāñ ke liye hī nahīñ maḳhsūs rakhā

merā paiġhām mohabbat hai jahāñ tak pahuñche

ḳhuub detā hai mujhe lutf-e-safar aap kā vo

bārhā phone pe kahnā ki kahāñ tak pahuñche

raah bhaTkī hai masarrat mire kūche se magar

ranj duniyā ke sabhī mere makāñ tak pahuñche

der se hī sahī par dekh mire naqsh-e-qadam

dasht meñ qais ke har ek nishāñ tak pahuñche

shā.erī kā to mujhe shauq nahīñ thā 'afzal'

un kī nazroñ se gire haiñ to yahāñ tak pahuñche

aaj tak jo na mere ashk-e-rawan tak pahunche

ghair mumkin hai ki wo dard-e-nihan tak pahunche

hae talib jo hue kakul-e-KHamdar ke hum

dekhiye aap hi KHud apne ziyan tak pahunche

yaad karne pe tujhe aise bhi aate hain KHayal

aaj tak jo na kabhi mere guman tak pahunche

kash aisi ho ata quwwat-e-guftar mujhe

main yahan sochun meri baat wahan tak pahunche

ku-e-jaanan ke liye hi nahin maKHsus rakha

mera paigham mohabbat hai jahan tak pahunche

KHub deta hai mujhe lutf-e-safar aap ka wo

barha phone pe kahna ki kahan tak pahunche

rah bhaTki hai masarrat mere kuche se magar

ranj duniya ke sabhi mere makan tak pahunche

der se hi sahi par dekh mere naqsh-e-qadam

dasht mein qais ke har ek nishan tak pahunche

shaeri ka to mujhe shauq nahin tha 'afzal'

un ki nazron se gire hain to yahan tak pahunche