aaj tak teri haqiqat na khuli kya hai tu

aaj tak terī haqīqat na khulī kyā hai tū

koī bhī jis ko na samjhe hai muammā hai tū

dil kā matlūb hai āñkhoñ kī tamanna hai tū

rashk-e-shīrīñ jo hai tū sīrat-e-lailā hai tū

jalva-e-ruḳh se tire saarā jahāñ raushan hai

raunaq-e-bazm hai tū anjuman-ārā hai tū

ban ke lailā kahīñ mash.hūr hasīnoñ meñ huā

sūrat-e-qais kahīñ āshiq-e-shaidā hai tū

jaan aa.e tan-e-be-jāñ meñ tire milne se

apne bīmār-e-mohabbat kā masīhā hai tū

sūrat-e-qais tire husn kā shaidā huuñ maiñ

aur mere liye bhī ġhairat-e-lailā hai tū

kyā tamāshā hai ki aalam kī nazar paḌtī hai

dekhne vāloñ kī āñkhoñ kā tamāshā hai tū

kaun mehmān hai 'hāmid' ke makān-e-dil meñ

tū hī kah de ki tasavvur hai tirā yā hai tū

aaj tak teri haqiqat na khuli kya hai tu

koi bhi jis ko na samjhe hai muamma hai tu

dil ka matlub hai aankhon ki tamanna hai tu

rashk-e-shirin jo hai tu sirat-e-laila hai tu

jalwa-e-ruKH se tere sara jahan raushan hai

raunaq-e-bazm hai tu anjuman-ara hai tu

ban ke laila kahin mashhur hasinon mein hua

surat-e-qais kahin aashiq-e-shaida hai tu

jaan aae tan-e-be-jaan mein tere milne se

apne bimar-e-mohabbat ka masiha hai tu

surat-e-qais tere husn ka shaida hun main

aur mere liye bhi ghairat-e-laila hai tu

kya tamasha hai ki aalam ki nazar paDti hai

dekhne walon ki aankhon ka tamasha hai tu

kaun mehman hai 'hamid' ke makan-e-dil mein

tu hi kah de ki tasawwur hai tera ya hai tu