aaj yun dil mein teri yaad hui hai bedar

aaj yuuñ dil meñ tirī yaad huī hai bedār

jaise ma.asūm se chehre pe tabassum kī phuvār

tā-kujā zulf-o-lab-o-ruḳh kī ye komal jhankār

sun sako gar to suno vaqt ke zaḳhmoñ kī pukār

jumbish-e-lab kī sazā aaj bhī is duniyā meñ

tauq-o-zanjīr kahīñ hai to kahīñ manzil-e-dār

jis taraf dekhiye jalve haiñ tirī qudrat ke

har taraf dekhiye riste hue zaḳhmoñ kī bahār

aaj jo dhaj hai tire kūche kī pahle to na thī

yuuñ to guzre haiñ inhī rastoñ se ham saikḌoñ baar

pursish-e-ġham hī bahut hai ki zamāne meñ 'ayāz'

kis ko fursat jo kare baiTh ke zaḳhmoñ kā shumār

aaj yun dil mein teri yaad hui hai bedar

jaise masum se chehre pe tabassum ki phuwar

ta-kuja zulf-o-lab-o-ruKH ki ye komal jhankar

sun sako gar to suno waqt ke zaKHmon ki pukar

jumbish-e-lab ki saza aaj bhi is duniya mein

tauq-o-zanjir kahin hai to kahin manzil-e-dar

jis taraf dekhiye jalwe hain teri qudrat ke

har taraf dekhiye riste hue zaKHmon ki bahaar

aaj jo dhaj hai tere kuche ki pahle to na thi

yun to guzre hain inhi raston se hum saikDon bar

pursish-e-gham hi bahut hai ki zamane mein 'ayaz'

kis ko fursat jo kare baiTh ke zaKHmon ka shumar