aakash bhi dharti bhi dishaen bhi meri hain

ākāsh bhī dhartī bhī dishā.eñ bhī mirī haiñ

jo zinda haiñ in meñ vo sadā.eñ bhī mirī haiñ

jo 'arsh-rasā haiñ vo bagūle bhī haiñ mere

jo taht-e-zamīñ haiñ vo fazā.eñ bhī mirī haiñ

paanī nahīñ jis meñ vo samundar bhī hai merā

sūraj nahīñ jin meñ vo guphā.eñ bhī mirī haiñ

rakkhā hai jo ab tak vo janāza bhī hai merā

jaltī haiñ jo ab tak vo chitāeñ bhī mirī haiñ

suntī hai jo duniyā vo kavītā bhī hai merī

likkhī na ga.iiñ jo vo kathā.eñ bhī mirī haiñ

hotā hai jo bāhar so vo mātam bhī hai merā

martī haiñ jo andar vo navā.eñ bhī mirī haiñ

jo zīnat-e-sar hai vo 'amāma bhī hai merā

jo nang-e-badan haiñ vo qabā.eñ bhī mirī haiñ

likkhā hai kuchh is tarh mirā nāma-e-ā'māl

sarzad na huiiñ jo vo ḳhatā.eñ bhī mirī haiñ

taalā nahīñ jis par vo nasheman bhī hai merā

dar jin ke nahīñ haiñ vo sarā.eñ bhī mirī haiñ

aakash bhi dharti bhi dishaen bhi meri hain

jo zinda hain in mein wo sadaen bhi meri hain

jo 'arsh-rasa hain wo bagule bhi hain mere

jo taht-e-zamin hain wo fazaen bhi meri hain

pani nahin jis mein wo samundar bhi hai mera

suraj nahin jin mein wo guphaen bhi meri hain

rakkha hai jo ab tak wo janaza bhi hai mera

jalti hain jo ab tak wo chitaen bhi meri hain

sunti hai jo duniya wo kawita bhi hai meri

likkhi na gain jo wo kathaen bhi meri hain

hota hai jo bahar so wo matam bhi hai mera

marti hain jo andar wo nawaen bhi meri hain

jo zinat-e-sar hai wo 'amama bhi hai mera

jo nang-e-badan hain wo qabaen bhi meri hain

likkha hai kuchh is tarh mera nama-e-a'mal

sarzad na huin jo wo KHataen bhi meri hain

tala nahin jis par wo nasheman bhi hai mera

dar jin ke nahin hain wo saraen bhi meri hain