aaKHir koi sharik-e-gham-e-bekasi to hai

āḳhir koī sharīk-e-ġham-e-bekasī to hai

ik sham.a raat bhar sar-e-bālīñ jalī to hai

is zindagī-e-ishq se ik zindagī to hai

mīThī sī ik ḳhalish mire dil meñ dabī to hai

yaad un kī sham.a-e-rāh-e-mohabbat huī to hai

mehr-o-vafā kī baat kuchh aage baḌhī to hai

har shauq nā-tamām hai har aarzū fareb

ham meñ zarūr dosto koī kamī to hai

āḳhir guzar hī jā.egī ġham kī tavīl raat

baaqī abhī charāġh meñ kuchh raushnī to hai

phūloñ se siikh ai dil-e-be-sabr sabr-o-zabt

dil meñ hazār zaḳhm hoñ lab par hañsī to hai

mujh par zamīñ hai tang magar koī ġham nahīñ

itne pe mutma.in huuñ ki terī galī to hai

mere dil-e-fasurda ko dekh ai bahār-e-nāz

maarī huī ḳhizāñ kī yahī ik kalī to hai

tū aur merī chashm-e-tasavvur meñ jalva-gar

ye bhī ḳhayāl-e-fikr kī bāzīgarī to hai

kyā ḳhauf-e-jashn hai ye shahīdān-e-nāz kā

gulshan meñ har taraf saf-e-mātam bichhī to hai

'muslim' duā.eñ dāġh-e-mohabbat ko dījiye

is se dil-o-dimāġh meñ ik raushnī to hai

aaKHir koi sharik-e-gham-e-bekasi to hai

ek shama raat bhar sar-e-baalin jali to hai

is zindagi-e-ishq se ek zindagi to hai

miThi si ek KHalish mere dil mein dabi to hai

yaad un ki shama-e-rah-e-mohabbat hui to hai

mehr-o-wafa ki baat kuchh aage baDhi to hai

har shauq na-tamam hai har aarzu fareb

hum mein zarur dosto koi kami to hai

aaKHir guzar hi jaegi gham ki tawil raat

baqi abhi charagh mein kuchh raushni to hai

phulon se sikh ai dil-e-be-sabr sabr-o-zabt

dil mein hazar zaKHm hon lab par hansi to hai

mujh par zamin hai tang magar koi gham nahin

itne pe mutmain hun ki teri gali to hai

mere dil-e-fasurda ko dekh ai bahaar-e-naz

mari hui KHizan ki yahi ek kali to hai

tu aur meri chashm-e-tasawwur mein jalwa-gar

ye bhi KHayal-e-fikr ki bazigari to hai

kya KHauf-e-jashn hai ye shahidan-e-naz ka

gulshan mein har taraf saf-e-matam bichhi to hai

'muslim' duaen dagh-e-mohabbat ko dijiye

is se dil-o-dimagh mein ek raushni to hai