aaKHiri zarb ko dil tir hua aaKHir-kar

āḳhirī zarb ko dil tiir huā āḳhir-kār

naḳhshab-e-husn bhī tasḳhīr huā āḳhir-kār

ḳhushbueñ mere ta.āqub se nahīñ baaz aa.iiñ

maiñ phir āmāda-e-taqsīr huā āḳhir-kār

ek sho.ala sar-e-qirtās-e-badan aa ke girā

āḳhirī harf bhī tahrīr huā āḳhir-kār

sang-o-ḳhisht us kī navāzish se hue ġhuncha-o-gul

ḳhatm mujh par fan-e-ta.amīr huā āḳhir-kār

sāl-hā-sāl se mahke na the dastak ke gulāb

sāme.a paikar-e-tasvīr huā āḳhir-e-kār

imtihāñ apnī nigāhoñ kā thā manzūr mujhe

munqata.a rishta-e-zanjīr huā āḳhir-kār

mere atrāf meñ khīñchā gayā āñkhoñ kā hisār

shor vābasta-e-tash.hīr huā āḳhir-kār

gosha-e-zehn meñ ik nukta-e-mauhūm kā raqs

raqs-e-kaunain kī tafsīr huā āḳhir-kār

aaKHiri zarb ko dil tir hua aaKHir-kar

naKHshab-e-husn bhi tasKHir hua aaKHir-kar

KHushbuen mere taaqub se nahin baz aain

main phir aamada-e-taqsir hua aaKHir-kar

ek shoala sar-e-qirtas-e-badan aa ke gira

aaKHiri harf bhi tahrir hua aaKHir-kar

sang-o-KHisht us ki nawazish se hue ghuncha-o-gul

KHatm mujh par fan-e-tamir hua aaKHir-kar

sal-ha-sal se mahke na the dastak ke gulab

samea paikar-e-taswir hua aaKHir-e-kar

imtihan apni nigahon ka tha manzur mujhe

munqata rishta-e-zanjir hua aaKHir-kar

mere atraf mein khincha gaya aankhon ka hisar

shor wabasta-e-tashhir hua aaKHir-kar

gosha-e-zehn mein ek nukta-e-mauhum ka raqs

raqs-e-kaunain ki tafsir hua aaKHir-kar