aalam teri yaadon ka munazzam to hua hai

aalam tirī yādoñ kā munazzam to huā hai

phir ek nayā silsila paiham to huā hai

ḳhatre ke nishāñ par thā tire husn kā dariyā

Takrā ke mire ishq se kuchh kam to huā hai

hindū kī hai he jis meñ musalmān kī hai m

vo lafz koī aur nahīñ ham to huā hai

do chaar tire ġham jo mile mujh ko ḳhusūsan

tujh meñ jo aqīda thā musallam to huā hai

ham rail kī paTrī kī tarah hī sahī lekin

mushtarka to rasta hai vo bāham to huā hai

phūloñ meñ chhupā kar jo mujhe bhejā thā patthar

vo tanz mire zaḳhm kā marham to huā hai

maanā ki tū zālim ke barābar nahīñ ai 'aks'

ūñchā.ī pe lekin mirā parcham to huā hai

aalam teri yaadon ka munazzam to hua hai

phir ek naya silsila paiham to hua hai

KHatre ke nishan par tha tere husn ka dariya

Takra ke mere ishq se kuchh kam to hua hai

hindu ki hai he jis mein musalman ki hai m

wo lafz koi aur nahin hum to hua hai

do chaar tere gham jo mile mujh ko KHususan

tujh mein jo aqida tha musallam to hua hai

hum rail ki paTri ki tarah hi sahi lekin

mushtarka to rasta hai wo baham to hua hai

phulon mein chhupa kar jo mujhe bheja tha patthar

wo tanz mere zaKHm ka marham to hua hai

mana ki tu zalim ke barabar nahin ai 'aks'

unchai pe lekin mera parcham to hua hai