aaluda-e-isyan KHud ki hai dil wo man-e-isyan kya hoga

ālūda-e-isyāñ ḳhud ki hai dil vo mān-e-isyāñ kyā hogā

jo apnī hifāzat kar na sakā vo merā nigahbāñ kyā hogā

zauq-e-dil-e-shāhāñ paidā kar tāj-e-sar-e-shāhāñ kyā hogā

jo luT na sake vo sāmāñ kar luT jaa.e jo sāmāñ kyā hogā

ġham-ḳhāna sanam-ḳhāna aivāñ yā ḳhāna-e-vīrāñ kyā hogā

qissa hai dil-e-dīvāna kā hairāñ huuñ ki unvāñ kyā hogā

jo sair-e-chaman ko aatā hai vo tālib-e-gul hī hotā hai

pūchhe koī un nā-dānoñ se ḳhār-e-chamanistāñ kyā hogā

kuchh shikva nahīñ itnā sun le ai mast-e-sitam nāvak-afgan

dil hī na rahegā jab merā phir terā ye paikāñ kyā hogā

ai hañsne hañsāne vaale jā afsurdagi-e-dil baḌhtī hai

jis ko ho azal se nisbat-e-ġham hañsne se vo ḳhandāñ kyā hogā

aaj apnī 'nazar' se vo dekheñ ye silsila-e-tūfāñ aa kar

kal kahte the jo hairāñ ho kar sāhil pe bhī tūfāñ kyā hogā

aaluda-e-isyan KHud ki hai dil wo man-e-isyan kya hoga

jo apni hifazat kar na saka wo mera nigahban kya hoga

zauq-e-dil-e-shahan paida kar taj-e-sar-e-shahan kya hoga

jo luT na sake wo saman kar luT jae jo saman kya hoga

gham-KHana sanam-KHana aiwan ya KHana-e-viran kya hoga

qissa hai dil-e-diwana ka hairan hun ki unwan kya hoga

jo sair-e-chaman ko aata hai wo talib-e-gul hi hota hai

puchhe koi un na-danon se KHar-e-chamanistan kya hoga

kuchh shikwa nahin itna sun le ai mast-e-sitam nawak-afgan

dil hi na rahega jab mera phir tera ye paikan kya hoga

ai hansne hansane wale ja afsurdagi-e-dil baDhti hai

jis ko ho azal se nisbat-e-gham hansne se wo KHandan kya hoga

aaj apni 'nazar' se wo dekhen ye silsila-e-tufan aa kar

kal kahte the jo hairan ho kar sahil pe bhi tufan kya hoga