aandhi ka kar KHayal na tewar hawa ke dekh

āñdhī kā kar ḳhayāl na tevar havā ke dekh

dīvār ret kī sahī ūñchī uThā ke dekh

saaya huuñ dhuup huuñ ki sarāboñ kā ruup huuñ

maiñ kyā huuñ kaun huuñ mire nazdīk aa ke dekh

apnī hī zaat meñ tū samundar huā to kyā

mere lahū meñ kholtā sūraj bujhā ke dekh

ik roz tū libās samajh kar mujhe pahan

kuchh der hī sahī mujhe apnā banā ke dekh

maiñ kāñch ke makān meñ rahtā huuñ in dinoñ

aa ai sadā-e-sañg mujhe aazmā ke dekh

shāyad kisī chaTān se jharnā ubal paḌe

patthar ke dil pe mom kā tesha jalā ke dekh

aatā hai kaun kaun tire ġham ko bāñTne

'zāhid' tū apnī maut kī afvāh uḌā ke dekh

aandhi ka kar KHayal na tewar hawa ke dekh

diwar ret ki sahi unchi uTha ke dekh

saya hun dhup hun ki sarabon ka rup hun

main kya hun kaun hun mere nazdik aa ke dekh

apni hi zat mein tu samundar hua to kya

mere lahu mein kholta suraj bujha ke dekh

ek roz tu libas samajh kar mujhe pahan

kuchh der hi sahi mujhe apna bana ke dekh

main kanch ke makan mein rahta hun in dinon

aa ai sada-e-sang mujhe aazma ke dekh

shayad kisi chaTan se jharna ubal paDe

patthar ke dil pe mom ka tesha jala ke dekh

aata hai kaun kaun tere gham ko banTne

'zahid' tu apni maut ki afwah uDa ke dekh