aandhiyon se kaise khelega tah-e-daman charagh

āñdhiy.oñ se kaise khelegā tah-e-dāman charāġh

chal ke āġhosh-e-havā meñ kījiye raushan charāġh

phūTtī hai tan ke andar hī se man kī raushnī

ye diye baatī kā rishta aur ye tan-man charāġh

yuuñ to kaalī raat sī hai ye ghaTā barsāt kī

us kī chaukhaT par jalātā hai magar sāvan charāġh

yaad ke kohre meñ lipTā chāñd sā chehra koī

jaise raushan ho darīche meñ pas-e-chilman charāġh

dasht-e-zulmat meñ safar yuuñ nange pairoñ tai huā

aable talvoñ ke phūTe jal uThe ban ban charāġh

luuT kar ab kaun le jā.egā ye māl-o-matā'

be-dar-o-dīvār sā ghar aur be-roġhan charāġh

us kī jhilmil āhaTeñ dīvār ke pīchhe mirī

ho ga.e sab rauzan-e-dīvār ghar āñgan charāġh

in dinoñ tārīkiyoñ ke sar pe hai zill-e-humā

ab kahāñ le jā ke rakkhe apnā ujlā-pan charāġh

'aks ho yā raushnī donoñ se ab Dartā hai vo

duur rakhiye us se shām-e-zindagī darpan charāġh

aandhiyon se kaise khelega tah-e-daman charagh

chal ke aaghosh-e-hawa mein kijiye raushan charagh

phuTti hai tan ke andar hi se man ki raushni

ye diye baati ka rishta aur ye tan-man charagh

yun to kali raat si hai ye ghaTa barsat ki

us ki chaukhaT par jalata hai magar sawan charagh

yaad ke kohre mein lipTa chand sa chehra koi

jaise raushan ho dariche mein pas-e-chilman charagh

dasht-e-zulmat mein safar yun nange pairon tai hua

aable talwon ke phuTe jal uThe ban ban charagh

luT kar ab kaun le jaega ye mal-o-mata'

be-dar-o-diwar sa ghar aur be-roghan charagh

us ki jhilmil aahaTen diwar ke pichhe meri

ho gae sab rauzan-e-diwar ghar aangan charagh

in dinon tarikiyon ke sar pe hai zill-e-huma

ab kahan le ja ke rakkhe apna ujla-pan charagh

'aks ho ya raushni donon se ab Darta hai wo

dur rakhiye us se sham-e-zindagi darpan charagh