aangan mein aangan hai na dalan ye ghar kaisa hai

āñgan meñ āñgan hai na dālān ye ghar kaisā hai

us ke har kamre meñ shaitān ye ghar kaisā hai

puḳhta us ke dar-o-dīvār darīche raushan

aur mujrim haiñ nigahbān ye ghar kaisā hai

yaañ makīnoñ ke diloñ se haiñ umañgeñ ġhā.eb

aur dimāġhoñ meñ haiñ hizyān ye ghar kaisā hai

koī rishtoñ kā taqaddus hai na hurmat kā ḳhayāl

bāhamī pyaar kā fuqdān ye ghar kaisā hai

jis se miliye nazar aatā hai ba-zāhir ḳhush-hāl

andar andar se pareshān ye ghar kaisā hai

kyā isī ghar meñ rahā karte the mere ajdād

jis ke har goshe meñ tūfān ye ghar kaisā hai

dar-o-dīvār se uThne lagī nafrat kī lapaT

har taraf maut kā sāmān ye ghar kaisā hai

nafsī-nafsī kā sā aalam hai yahāñ chaar taraf

kuchh batāo to mirī jaan ye ghar kaisā hai

ḳhud to koshish nahīñ kartā hai samajhne kī 'sahar'

pūchhtā phirtā hai nādān ye ghar kaisā hai

aangan mein aangan hai na dalan ye ghar kaisa hai

us ke har kamre mein shaitan ye ghar kaisa hai

puKHta us ke dar-o-diwar dariche raushan

aur mujrim hain nigahban ye ghar kaisa hai

yan makinon ke dilon se hain umangen ghaeb

aur dimaghon mein hain hizyan ye ghar kaisa hai

koi rishton ka taqaddus hai na hurmat ka KHayal

bahami pyar ka fuqdan ye ghar kaisa hai

jis se miliye nazar aata hai ba-zahir KHush-haal

andar andar se pareshan ye ghar kaisa hai

kya isi ghar mein raha karte the mere ajdad

jis ke har goshe mein tufan ye ghar kaisa hai

dar-o-diwar se uThne lagi nafrat ki lapaT

har taraf maut ka saman ye ghar kaisa hai

nafsi-nafsi ka sa aalam hai yahan chaar taraf

kuchh batao to meri jaan ye ghar kaisa hai

KHud to koshish nahin karta hai samajhne ki 'sahar'

puchhta phirta hai nadan ye ghar kaisa hai