aangan se hi KHushi ke wo lamhe palaT gae

āñgan se hī ḳhushī ke vo lamhe palaT ga.e

sahrā-e-dil se barse baġhair abr chhaT ga.e

rishtoñ kā ik hujūm thā kahne ko ās-pās

jab vaqt aa paḌā to ta.alluq simaT ga.e

ik samt tum khaḌe the zamāna thā ek samt

ham tum se mil ga.e to zamāne se kaT ga.e

rasm-o-rah-e-jahāñ kā to thā dā.era vasī.a

apnī hadoñ meñ aap hī ham log baT ga.e

hamdardiyoñ kī bhiiḌ sahar se thī saath saath

jab dhuup sar pe aa.ī to saa.e simaT ga.e

bedāriyoñ ke saath thā hañgāma-e-hayāt

niiñd aa ga.ī to saare masā.il nipaT ga.e

is inqalāb-e-daur-e-taraqqī ke āfrīñ

majma.a baḌā huā hai to insān ghaT ga.e

aangan se hi KHushi ke wo lamhe palaT gae

sahra-e-dil se barse baghair abr chhaT gae

rishton ka ek hujum tha kahne ko aas-pas

jab waqt aa paDa to talluq simaT gae

ek samt tum khaDe the zamana tha ek samt

hum tum se mil gae to zamane se kaT gae

rasm-o-rah-e-jahan ka to tha daera wasia

apni hadon mein aap hi hum log baT gae

hamdardiyon ki bhiD sahar se thi sath sath

jab dhup sar pe aai to sae simaT gae

bedariyon ke sath tha hangama-e-hayat

nind aa gai to sare masail nipaT gae

is inqalab-e-daur-e-taraqqi ke aafrin

majma baDa hua hai to insan ghaT gae