aankh apne hi taqazon se haya karti hai

aañkh apne hī taqāzoñ se hayā kartī hai

koī ḳhushbū mujhe phūloñ se judā kartī hai

ek āñdhī hai ki kartī hai adāvat har din

ek mash'al hai ki duniyā se vafā kartī hai

ye to kab rok sakī dil se bichhaḌne vaale

'iid apne hī usūloñ pe huā kartī hai

koī titlī hai ki rotī hai ḳhushī ke aañsū

koī dul.han hai ki jo chāñd takā kartī hai

sub.h laatī hai ujāle se naved-e-gulshan

raat rūThe hue tāroñ se vafā kartī hai

'iid hotī hai ḳhushī milne kī lekin us din

zindagī apnī udāsī se milā kartī hai

ḳhvāb ke dasht meñ ik ashk bahāne ke liye

koī rūThī huī tā'bīr khulā kartī hai

zindagī apnī musāfir thī musāfir ho kar

yūñhī tanhā.ī ke parde meñ sanā kartī hai

aankh apne hi taqazon se haya karti hai

koi KHushbu mujhe phulon se juda karti hai

ek aandhi hai ki karti hai adawat har din

ek mash'al hai ki duniya se wafa karti hai

ye to kab rok saki dil se bichhaDne wale

'id apne hi usulon pe hua karti hai

koi titli hai ki roti hai KHushi ke aansu

koi dulhan hai ki jo chand taka karti hai

subh lati hai ujale se nawed-e-gulshan

raat ruThe hue taron se wafa karti hai

'id hoti hai KHushi milne ki lekin us din

zindagi apni udasi se mila karti hai

KHwab ke dasht mein ek ashk bahane ke liye

koi ruThi hui ta'bir khula karti hai

zindagi apni musafir thi musafir ho kar

yunhi tanhai ke parde mein sana karti hai