aankh be-KHwabi pe qurban dil nisar-e-intizar

aañkh be-ḳhvābī pe qurbāñ dil nisār-e-intizār

aur hī hogā koī shikva-guzār-e-intizār

kar diyā hai kis ke jalve ne shikār-e-intizār

maiñ huuñ aur āThoñ pahar vo rahguzār-e-intizār

koī mujh se hashr ko milne kā va.ada kar gayā

ik qayāmat ho ga.e lail-o-nahār-e-intizār

jab kisī kā va.ada-e-fardā mujhe yaad aa gayā

phir ga.ī merī nazar meñ rahguzār-e-intizār

ab bhī hai ye haal dekhā jis taraf dekhā kiyā

merī hairānī hai goyā yādgār-e-intizār

vo chale aate haiñ betābāna mere paas kyoñ

allah-allah jazba-e-be-iḳhtiyār-e-intizār

kis tarah vo bul-havas ho vasl kā lazzat-shanās

jis ne luuTī ho na 'sā.ib' kuchh bahār-e-intizār

aankh be-KHwabi pe qurban dil nisar-e-intizar

aur hi hoga koi shikwa-guzar-e-intizar

kar diya hai kis ke jalwe ne shikar-e-intizar

main hun aur aaThon pahar wo rahguzar-e-intizar

koi mujh se hashr ko milne ka wada kar gaya

ek qayamat ho gae lail-o-nahaar-e-intizar

jab kisi ka wada-e-farda mujhe yaad aa gaya

phir gai meri nazar mein rahguzar-e-intizar

ab bhi hai ye haal dekha jis taraf dekha kiya

meri hairani hai goya yaadgar-e-intizar

wo chale aate hain betabana mere pas kyon

allah-allah jazba-e-be-iKHtiyar-e-intizar

kis tarah wo bul-hawas ho wasl ka lazzat-shanas

jis ne luTi ho na 'saib' kuchh bahaar-e-intizar