aankh ek chahat ka dariya dil samundar ban gaya

aañkh ik chāhat kā dariyā dil samundar ban gayā

maiñ du'ā bantī ga.ī aur tū muqaddar ban gayā

ik nazar meñ chun liyā ik dūsre ko aur phir

do diloñ ke do makāñ milne se ik ghar ban gayā

baat karte karte us ne haath merā chhū liyā

lams mahkā aañkh chamkī husn paikar ban gayā

laakh logoñ ne bichhā.e raah meñ kāñTe magar

khiḌkiyāñ khultī ga.iiñ dīvār meñ dar ban gayā

dil kā ik dar band hone se ka.ī raste mile

aa.ina TuuTā magar ik aur manzar ban gayā

maiñ ne us ko roknā chāhā magar phir yuuñ huā

vo kisī āvāz se Takrā ke patthar ban gayā

aankh ek chahat ka dariya dil samundar ban gaya

main du'a banti gai aur tu muqaddar ban gaya

ek nazar mein chun liya ek dusre ko aur phir

do dilon ke do makan milne se ek ghar ban gaya

baat karte karte us ne hath mera chhu liya

lams mahka aankh chamki husn paikar ban gaya

lakh logon ne bichhae rah mein kanTe magar

khiDkiyan khulti gain diwar mein dar ban gaya

dil ka ek dar band hone se kai raste mile

aaina TuTa magar ek aur manzar ban gaya

main ne us ko rokna chaha magar phir yun hua

wo kisi aawaz se Takra ke patthar ban gaya