aankh jab aaine mein paDti hai

aañkh jab aa.ine meñ paḌtī hai

zindagī dekhne meñ paḌtī hai

roz kaTtī hai fasl ḳhushbū kī

aur tire tauliye meñ paḌtī hai

din kisī ma.arke meñ kaTtā hai

shab kisī morche meñ paḌtī hai

chhoḌ duniyā kī baat dil kī sun

chhoḌ kis vasvase meñ paḌtī hai

tū nahīñ hai to raat bhar bārish

jaane kis silsile meñ paḌtī hai

paañv ko laakh khīñchtā huuñ magar

vo galī rāste meñ paḌtī hai

gardish-e-vaqt terī aañkh ke is

pur-kashish dā.ere meñ paḌtī hai

ishq ke aur haiñ makān-o-zamāñ

umr ik sāniye meñ paḌtī hai

zindagī to vahāñ bhī hai 'ashraf'

barf jis mintaqe meñ paḌtī hai

aankh jab aaine mein paDti hai

zindagi dekhne mein paDti hai

roz kaTti hai fasl KHushbu ki

aur tere tauliye mein paDti hai

din kisi marke mein kaTta hai

shab kisi morche mein paDti hai

chhoD duniya ki baat dil ki sun

chhoD kis waswase mein paDti hai

tu nahin hai to raat bhar barish

jaane kis silsile mein paDti hai

panw ko lakh khinchta hun magar

wo gali raste mein paDti hai

gardish-e-waqt teri aankh ke is

pur-kashish daere mein paDti hai

ishq ke aur hain makan-o-zaman

umr ek saniye mein paDti hai

zindagi to wahan bhi hai 'ashraf'

barf jis mintaqe mein paDti hai