aankh jab saqi pe Dali jaegi

aañkh jab saaqī pe Daalī jā.egī

phir tabī.at kyā sañbhālī jā.egī

chuTkiyāñ lene kī vo karte haiñ mashq

shoḳhiyoñ meñ jaan Daalī jā.egī

kyoñ pareshāñ kar rahī hai baaġh meñ

bū-e-gul tujh se sabā lī jā.egī

ham idhar haiñ sāmne hai aa.ina

aañkh kis kis par nikālī jā.egī

phuul kaise mar-miToñ kī qabr par

ḳhaak bhī tum se na Daalī jā.egī

dekhne hī ko hai bas saaqī kī aañkh

mai na is sāġhar meñ Daalī jā.egī

dam nikal jā.egā hasrat se mirā

teġh qātil kī jo ḳhālī jā.egī

dil agar TuuTā to phir be-kār hai

zulf bigḌegī banā lī jā.egī

kyoñ gale miltī nahīñ vo teġh-e-nāz

iid kyā ab kī bhī ḳhālī jā.egī

koī kahtā hai ki 'safdar' ye ġhazal

nuur ke sāñche meñ Dhālī jā.egī

aankh jab saqi pe Dali jaegi

phir tabiat kya sanbhaali jaegi

chuTkiyan lene ki wo karte hain mashq

shoKHiyon mein jaan Dali jaegi

kyon pareshan kar rahi hai bagh mein

bu-e-gul tujh se saba li jaegi

hum idhar hain samne hai aaina

aankh kis kis par nikali jaegi

phul kaise mar-miTon ki qabr par

KHak bhi tum se na Dali jaegi

dekhne hi ko hai bas saqi ki aankh

mai na is saghar mein Dali jaegi

dam nikal jaega hasrat se mera

tegh qatil ki jo KHali jaegi

dil agar TuTa to phir be-kar hai

zulf bigDegi bana li jaegi

kyon gale milti nahin wo tegh-e-naz

id kya ab ki bhi KHali jaegi

koi kahta hai ki 'safdar' ye ghazal

nur ke sanche mein Dhaali jaegi