aankh jab tar na thi dil shikasta na tha zindagi mein thi lazzat kahan dosto

aañkh jab tar na thī dil shikasta na thā zindagī meñ thī lazzat kahāñ dosto

vo to kahiye ki soz-e-jigar mil gayā ḳhūn-e-dil ho gayā nā-gahāñ dosto

tum to dīvāna Thahrā rahe the hameñ de rahe the nā dushnām-e-dīvāngī

tīrgī meñ charāġhāñ ye kis ne kiyā kis ne badlā chaman kā samāñ dosto

umr kaliyoñ kī kitnī jo batlā sakeñ kis ke ḳhūn-e-jigar se hai husn-e-chaman

ḳhāk-e-gulshan se pūchho bahāroñ meñ hai kis ke ḳhuuñ se ye gulkāriyāñ dosto

jab nasīm-e-sahar kī zabānī sunī merī rūdād-e-ġham sahn-e-gulzār meñ

zabt shabnam se aañsū na phir ho sake qalb-e-gul ho gayā ḳhūñ-chakāñ dosto

kis qadar ham ne khaa.e haiñ tīr-e-sitam gardish-e-vaqt ke kyā ginā.eñ karam

un kā dāman chhuTā ḳhūn-e-armāñ huā fasl-e-gul meñ jalā āshiyāñ dosto

kaise TuuTā hai dil kis ne toḌā hai dil sāneha kis tarah ye huā rūnumā

yuuñ na rah rah ke chheḌo ḳhudā ke liye mohtaram sāthiyo mehrbāñ dosto

chaak siine meñ apne bhī kuchh kam na the ham ne zaḳhmoñ kī lekin numā.ish na kī

ye alag baat hai misl-e-gul ham rahe gulsitāñ meñ tabassum-fashāñ dosto

jin se milne ko betāb rahte the ham un se ḳhalvat meñ sāmnā ho gayā

kis ne dekhā unheñ kaun un se milā aa ga.ī be-ḳhudī darmiyāñ dosto

baat kyā hai hameñ bhī to ho kuchh ḳhabar kyoñ vo ghar se nikaltā nahīñ āj-kal

zikr kis shaḳhs kā aaj ye chhiḌ gayā kaun 'jauhar' vo sheva-bayāñ dosto

aankh jab tar na thi dil shikasta na tha zindagi mein thi lazzat kahan dosto

wo to kahiye ki soz-e-jigar mil gaya KHun-e-dil ho gaya na-gahan dosto

tum to diwana Thahra rahe the hamein de rahe the na dushnam-e-diwangi

tirgi mein charaghan ye kis ne kiya kis ne badla chaman ka saman dosto

umr kaliyon ki kitni jo batla saken kis ke KHun-e-jigar se hai husn-e-chaman

KHak-e-gulshan se puchho bahaaron mein hai kis ke KHun se ye gulkariyan dosto

jab nasim-e-sahar ki zabani suni meri rudad-e-gham sahn-e-gulzar mein

zabt shabnam se aansu na phir ho sake qalb-e-gul ho gaya KHun-chakan dosto

kis qadar hum ne khae hain tir-e-sitam gardish-e-waqt ke kya ginaen karam

un ka daman chhuTa KHun-e-arman hua fasl-e-gul mein jala aashiyan dosto

kaise TuTa hai dil kis ne toDa hai dil saneha kis tarah ye hua runuma

yun na rah rah ke chheDo KHuda ke liye mohtaram sathiyo mehrban dosto

chaak sine mein apne bhi kuchh kam na the hum ne zaKHmon ki lekin numaish na ki

ye alag baat hai misl-e-gul hum rahe gulsitan mein tabassum-fashan dosto

jin se milne ko betab rahte the hum un se KHalwat mein samna ho gaya

kis ne dekha unhen kaun un se mila aa gai be-KHudi darmiyan dosto

baat kya hai hamein bhi to ho kuchh KHabar kyon wo ghar se nikalta nahin aaj-kal

zikr kis shaKHs ka aaj ye chhiD gaya kaun 'jauhar' wo shewa-bayan dosto