aankh kahti hai hamein ab ashk-bari chhoD den

aañkh kahtī hai hameñ ab ashk-bārī chhoḌ deñ

āñsuoñ se dil kī kaise ābyārī chhoḌ deñ

hai muqaddar par yaqīñ ham ko rahe itnā ḳhayāl

ḳhaak hai qismat to kaise ḳhāksārī chhoḌ deñ

bad-lihāzī jis qadar merī tabī'at meñ hai dost

ye bhī mumkin hai mujhe sab baarī baarī chhoḌ deñ

dosto karnā paḌegā ab hameñ ye faisla

duniyā-dārī chhoḌ deñ yā inkisārī chhoḌ deñ

ho rahī hai dosto tum ko ġhalat-fahmī koī

kaise mumkin hai parinde ko shikārī chhoḌ deñ

'ishq ko matlūb haiñ be-chainiyāñ jazbāt kī

zindagī kahtī hai ham ko be-qarārī chhoḌ deñ

duur rah kar aadmī bechain rahtā hai zarūr

aap mere hijr kī manzar-nigārī chhoḌ deñ

dostoñ aur dushmanoñ kā 'ilm honā chāhiye

kis liye 'mannān' ham rā.e-shumārī chhoḌ deñ

aankh kahti hai hamein ab ashk-bari chhoD den

aansuon se dil ki kaise aabyari chhoD den

hai muqaddar par yaqin hum ko rahe itna KHayal

KHak hai qismat to kaise KHaksari chhoD den

bad-lihazi jis qadar meri tabi'at mein hai dost

ye bhi mumkin hai mujhe sab bari bari chhoD den

dosto karna paDega ab hamein ye faisla

duniya-dari chhoD den ya inkisari chhoD den

ho rahi hai dosto tum ko ghalat-fahmi koi

kaise mumkin hai parinde ko shikari chhoD den

'ishq ko matlub hain be-chainiyan jazbaat ki

zindagi kahti hai hum ko be-qarari chhoD den

dur rah kar aadmi bechain rahta hai zarur

aap mere hijr ki manzar-nigari chhoD den

doston aur dushmanon ka 'ilm hona chahiye

kis liye 'mannan' hum rae-shumari chhoD den