aankh ke parde ke pichhe ek saman rah jaega

aañkh ke parde ke pīchhe ik samāñ rah jā.egā

aag ke sho.ale bujhe tab bhī dhuāñ rah jā.egā

kyā ajab kal phir yaqīñ meñ shak kī āmezish mile

shak agar miT bhī gayā phir bhī gumāñ rah jā.egā

sirf hone ko fanā hai jo nahīñ us kī baqā

āsmāñ kuchh bhī nahīñ hai āsmāñ rah jā.egā

terī qurbat se hasīñ mausam bhī hai ḳhushbū bhī hai

qurbateñ gar na raheñ phir kyā yahāñ rah jā.egā

tujh se milne kī masarrat aur bichhaḌne kā malāl

hai masarrat aarzī soz-e-nihāñ rah jā.egā

jism ik ḳhālī makāñ thā aaj se ābād hai

ruuh jab uḌ jā.egī makāñ rah jā.egā

log kahte haiñ hisāb-e-dostāñ dar-dil shivad

aaj 'mirzā' ye maqūla bhī kahāñ rah jā.egā

aankh ke parde ke pichhe ek saman rah jaega

aag ke shoale bujhe tab bhi dhuan rah jaega

kya ajab kal phir yaqin mein shak ki aamezish mile

shak agar miT bhi gaya phir bhi guman rah jaega

sirf hone ko fana hai jo nahin us ki baqa

aasman kuchh bhi nahin hai aasman rah jaega

teri qurbat se hasin mausam bhi hai KHushbu bhi hai

qurbaten gar na rahen phir kya yahan rah jaega

tujh se milne ki masarrat aur bichhaDne ka malal

hai masarrat aarzi soz-e-nihan rah jaega

jism ek KHali makan tha aaj se aabaad hai

ruh jab uD jaegi makan rah jaega

log kahte hain hisab-e-dostan dar-dil shiwad

aaj 'mirza' ye maqula bhi kahan rah jaega