aankh ki dahliz se utra to sahra ho gaya

aañkh kī dahlīz se utrā to sahrā ho gayā

qatra-e-ḳhūñ pāniyoñ ke saath rusvā ho gayā

ḳhaak kī chādar meñ jism o jaañ simaTte hī nahīñ

aur zamīñ kā rañg bhī ab dhuup jaisā ho gayā

ek ik kar ke mire sab lafz miTTī ho ga.e

aur is miTTī meñ dhañs kar maiñ zamīñ kā ho gayā

tujh se kyā bichhḌe ki āñkheñ reza reza ho ga.iiñ

aa.ina TuuTā to ik ā.īna-ḳhāna ho gayā

ai havā-e-vasl chal phir se gul-e-hijrāñ khilā

sar uThā phir ai nihāl-e-ġham saverā ho gayā

ai jamāl-e-fan use mat ro ki tan-āsān thā

terī duniyāoñ kā 'ḳhāvar' sarf-e-duniyā ho gayā

aankh ki dahliz se utra to sahra ho gaya

qatra-e-KHun paniyon ke sath ruswa ho gaya

KHak ki chadar mein jism o jaan simaTte hi nahin

aur zamin ka rang bhi ab dhup jaisa ho gaya

ek ek kar ke mere sab lafz miTTi ho gae

aur is miTTi mein dhans kar main zamin ka ho gaya

tujh se kya bichhDe ki aankhen reza reza ho gain

aaina TuTa to ek aaina-KHana ho gaya

ai hawa-e-wasl chal phir se gul-e-hijran khila

sar uTha phir ai nihaal-e-gham sawera ho gaya

ai jamal-e-fan use mat ro ki tan-asan tha

teri duniyaon ka 'KHawar' sarf-e-duniya ho gaya