aankh ki zid ko hamesha hi se bahlaya gaya

aañkh kī zid ko hamesha hī se bahlāyā gayā

ek chehre ko ka.ī chehroñ meñ dikhlāyā gayā

mere paañv nit na.e rastoñ se the kab āshnā

sadiyoñ pahle thā jahāñ mujh ko vahīñ paayā gayā

phir huī bedār ḳhvāhish aañkh meñ aa.ī chamak

phir kisī ko dhuup sā malbūs pahnāyā gayā

sunñe vāloñ ne to dekhā bhī nahīñ thā chauñk kar

raaz siine se nikal ke hoñT par aayā gayā

is qadar thā sañg-dil jaise kisī qātil kā dil

mujh se vo māhaul ai 'ḳhālid' na apnāyā gayā

aankh ki zid ko hamesha hi se bahlaya gaya

ek chehre ko kai chehron mein dikhlaya gaya

mere panw nit nae raston se the kab aashna

sadiyon pahle tha jahan mujh ko wahin paya gaya

phir hui bedar KHwahish aankh mein aai chamak

phir kisi ko dhup sa malbus pahnaya gaya

sunne walon ne to dekha bhi nahin tha chaunk kar

raaz sine se nikal ke honT par aaya gaya

is qadar tha sang-dil jaise kisi qatil ka dil

mujh se wo mahaul ai 'KHalid' na apnaya gaya