aankh lag jati hai phir bhi jagta rahta hun main

aañkh lag jaatī hai phir bhī jāgtā rahtā huuñ maiñ

niiñd ke aalam meñ kyā kyā sochtā rahtā huuñ maiñ

tairtī rahtī haiñ mere ḳhuuñ meñ ġham kī kirchiyāñ

kāñch kī sūrat badan meñ TūTtā rahtā huuñ maiñ

saañp ke mānind kyuuñ Dastī hai bāhar kī fazā

kyuuñ hisār-e-jism meñ mahbūs sā rahtā huuñ maiñ

pheñktā rahtā hai patthar kaun dil kī jhiil meñ

dā.era-dar-dā.era kyuuñ phailtā rahtā huuñ maiñ

Tahniyāñ kaT kaT ke ug aatī haiñ phir se dard kī

ik sanobar karb kā ban kar harā rahtā huuñ maiñ

is se baḌh kar aur kyā hotī pareshānī mujhe

ye sitam kam hai ki ḳhud se bhī judā rahtā huuñ maiñ

aankh lag jati hai phir bhi jagta rahta hun main

nind ke aalam mein kya kya sochta rahta hun main

tairti rahti hain mere KHun mein gham ki kirchiyan

kanch ki surat badan mein TuTta rahta hun main

sanp ke manind kyun Dasti hai bahar ki faza

kyun hisar-e-jism mein mahbus sa rahta hun main

phenkta rahta hai patthar kaun dil ki jhil mein

daera-dar-daera kyun phailta rahta hun main

Tahniyan kaT kaT ke ug aati hain phir se dard ki

ek sanobar karb ka ban kar hara rahta hun main

is se baDh kar aur kya hoti pareshani mujhe

ye sitam kam hai ki KHud se bhi juda rahta hun main