aankh mein aansu nazar mein dard paida kar gaya

aañkh meñ aañsū nazar meñ dard paidā kar gayā

merā hañsne kā irāda kyā ġhazab Dhā kar gayā

maiñ ne barsātoñ meñ jalte ghar kabhī dekhe na the

maiñ isī bā'is tire ġham ko gavārā kar gayā

merī koshish thī muqaddar ko na.ī jihateñ milīñ

aur isī koshish meñ ḳhud ko be-sar-o-pā kar gayā

ḳhush-yaqīnī bhī khilā detī hai kaise kaise gul

ek din vallāh maiñ ḳhud par bharosā kar gayā

baat usūloñ kī nahīñ hai baat kuchh qadroñ kī hai

ḳhvāb jhūTe the magar maiñ un ko sachchā kar gayā

bas yahī sūrat chhupāne kī inheñ niklī ki maiñ

har kisī ke sāmne zaḳhmoñ ko nangā kar gayā

muddatoñ merī hayāt ummīd kā mehvar rahī

phir koī shaḳhs aa ke 'hairat' sab kuchh ulTā kar gayā

aankh mein aansu nazar mein dard paida kar gaya

mera hansne ka irada kya ghazab Dha kar gaya

main ne barsaton mein jalte ghar kabhi dekhe na the

main isi ba'is tere gham ko gawara kar gaya

meri koshish thi muqaddar ko nai jihaten milin

aur isi koshish mein KHud ko be-sar-o-pa kar gaya

KHush-yaqini bhi khila deti hai kaise kaise gul

ek din wallah main KHud par bharosa kar gaya

baat usulon ki nahin hai baat kuchh qadron ki hai

KHwab jhuTe the magar main un ko sachcha kar gaya

bas yahi surat chhupane ki inhen nikli ki main

har kisi ke samne zaKHmon ko nanga kar gaya

muddaton meri hayat ummid ka mehwar rahi

phir koi shaKHs aa ke 'hairat' sab kuchh ulTa kar gaya