aankh mein ashk ka jis tarh sitara chamke

aañkh meñ ashk kā jis tarh sitāra chamke

kaash us tarh muqaddar bhī hamārā chamke

koī hasrat koī ḳhvāhish na adhūrī rah jaa.e

ḳhvāb chamke jo agar saare kā saarā chamke

bujh ga.e jo bhī diye vaqt kī is āñdhī meñ

un kī qismat kā sitāra bhī dubāra chamke

daaġh jitne bhī mile tum se mujhe ulfat meñ

hai du'ā merī vo har daaġh tumhārā chamke

vo ho gulshan meñ to gulshan kī fazā raushan ho

vo ho manzar meñ to har ek nazāra chamke

zindagī tū ne diye sirf ḳhasāre ham ko

ham ḳhasāroñ kā magar le ke sahārā chamke

aañkh aise hī nahīñ hotī hai nam har lahza

us ne chāhā thā ki dariyā kā kināra chamke

muntazir huuñ maiñ kisī roz du'āoñ ke 'evaz

mere dāman meñ bhī qudrat kā ishāra chamke

aankh mein ashk ka jis tarh sitara chamke

kash us tarh muqaddar bhi hamara chamke

koi hasrat koi KHwahish na adhuri rah jae

KHwab chamke jo agar sare ka sara chamke

bujh gae jo bhi diye waqt ki is aandhi mein

un ki qismat ka sitara bhi dubara chamke

dagh jitne bhi mile tum se mujhe ulfat mein

hai du'a meri wo har dagh tumhaara chamke

wo ho gulshan mein to gulshan ki faza raushan ho

wo ho manzar mein to har ek nazara chamke

zindagi tu ne diye sirf KHasare hum ko

hum KHasaron ka magar le ke sahaara chamke

aankh aise hi nahin hoti hai nam har lahza

us ne chaha tha ki dariya ka kinara chamke

muntazir hun main kisi roz du'aon ke 'ewaz

mere daman mein bhi qudrat ka ishaara chamke