aankh mein bhige sitaron ki farawani mili

aañkh meñ bhīge sitāroñ kī farāvānī milī

ham ne phir ishq kiyā aur pashemānī milī

dil ne kyā paayā mohabbat meñ ba-juz dard-e-firāq

ruuh ko zaḳhm milā zaḳhm ko tābānī milī

ek manzar ne palaT kar sar-e-manzar dekhā

mujh ko hairānī tujhe ā.ina-sāmānī milī

raat ik sajda-e-hairān jahāñ rakkhā thā

sub.h vaañ dard se phaTtī huī peshānī milī

bah ga.ī thī jo kabhī sail-e-jamāl-e-kun meñ

mauj-dar-mauj usī chashm kī hairānī milī

vo jise tark kiyā tū ne ta'alluq kī tarah

ham ko us hijr ke badle meñ ġhazal-ḳhvānī milī

aankh mein bhige sitaron ki farawani mili

hum ne phir ishq kiya aur pashemani mili

dil ne kya paya mohabbat mein ba-juz dard-e-firaq

ruh ko zaKHm mila zaKHm ko tabani mili

ek manzar ne palaT kar sar-e-manzar dekha

mujh ko hairani tujhe aaina-samani mili

raat ek sajda-e-hairan jahan rakkha tha

subh wan dard se phaTti hui peshani mili

bah gai thi jo kabhi sail-e-jamal-e-kun mein

mauj-dar-mauj usi chashm ki hairani mili

wo jise tark kiya tu ne ta'alluq ki tarah

hum ko us hijr ke badle mein ghazal-KHwani mili