aankh mein nindon ke Dere panw mein jamid hawas

aañkh meñ nīñdoñ ke Dere paañv meñ jāmid havas

jaan meñ har-sū ḳhamoshī jī ko uljhan kuchh nahīñ

nai giraftārī meñ lazzat nai ravānī meñ maza

ik sukūñ sabza-zada sāñsoñ meñ phislan kuchh nahīñ

yā samāñ sākit huā yā phir basīrat kho ga.ī

shor saḌkoñ par nahīñ rangoñ meñ ban-Than kuchh nahīñ

valvala bādal meñ mafqūd aur chādar hai havā

Tiin par girtī huī būñdoñ meñ dhaḌkan kuchh nahīñ

nai sutūnoñ kā sahārā aur na chhat kā hausla

ik makāñ aisā milā dīvār āñgan kuchh nahīñ

āsmāñ be-sāñs hai sahrā sukūt-e-sāz hai

ek arsa ho gayā ab zeb-e-dāman kuchh nahīñ

aankh mein nindon ke Dere panw mein jamid hawas

jaan mein har-su KHamoshi ji ko uljhan kuchh nahin

nai giraftari mein lazzat nai rawani mein maza

ek sukun sabza-zada sanson mein phislan kuchh nahin

ya saman sakit hua ya phir basirat kho gai

shor saDkon par nahin rangon mein ban-Than kuchh nahin

walwala baadal mein mafqud aur chadar hai hawa

Tin par girti hui bundon mein dhaDkan kuchh nahin

nai sutunon ka sahaara aur na chhat ka hausla

ek makan aisa mila diwar aangan kuchh nahin

aasman be-sans hai sahra sukut-e-saz hai

ek arsa ho gaya ab zeb-e-daman kuchh nahin