aankh paD jae agar paikar-e-ranai par

aañkh paḌ jaa.e agar paikar-e-rānā.ī par

ik qayāmat sī guzar jā.egī bīnā.ī par

merā da.avā hai mirā zaḳhm nahīñ bhar saktā

shahr ke shahr utar aa.eñ masīhā.ī par

chaak kartī hai nadāmat kī anī siine ko

ġhaiz meñ haath uThāyā thā baḌe bhaa.ī par

putliyāñ kar na sakīñ jism-e-tavāf-e-jānāñ

dil fidā ho bhī gayā zulf kī añgḌā.ī par

aap ik ret kā ambār nazar ā.eñge

gar mahārat hī nahīñ quvvat-e-goyā.ī par

ek dīvān ke sāñche meñ tujhe Dhālūñgā

ek dīvān likhūñgā tire shaidā.ī par

asr-e-āshūr ik āvāz uThī maqtal se

tabsira log kareñge mirī tanhā.ī par

maiñ koī yūsuf-e-kan.ān nahīñ 'mehvar' huuñ

hosh meñ aao na kaT jaa.eñ zuleḳhā.ī par

aankh paD jae agar paikar-e-ranai par

ek qayamat si guzar jaegi binai par

mera dawa hai mera zaKHm nahin bhar sakta

shahr ke shahr utar aaen masihai par

chaak karti hai nadamat ki ani sine ko

ghaiz mein hath uThaya tha baDe bhai par

putliyan kar na sakin jism-e-tawaf-e-jaanan

dil fida ho bhi gaya zulf ki angDai par

aap ek ret ka ambar nazar aaenge

gar mahaarat hi nahin quwwat-e-goyai par

ek diwan ke sanche mein tujhe Dhaalunga

ek diwan likhunga tere shaidai par

asr-e-ashur ek aawaz uThi maqtal se

tabsira log karenge meri tanhai par

main koi yusuf-e-kanan nahin 'mehwar' hun

hosh mein aao na kaT jaen zuleKHai par