aankh se is fikr mein hota nahin pani juda

aañkh se is fikr meñ hotā nahīñ paanī judā

ek din ho jā.egī mujh se mirī beTī judā

maujib-e-furqat vahāñ bhī dāna-e-gandum hī thā

aur aksar yaañ bhī ham ko kartī hai roTī judā

vādī-e-dil tak nazar aa.egī ik chhoTī lakīr

kar rahe ho aañkh se tum jis tarah paanī judā

bād-o-bārāñ ne bhī us se dil-lagī kyā ḳhuub kī

jo uḌā kar le ga.iiñ chhatrī judā chunarī judā

ḳhvāhishoñ par phir musallat ho ga.e duniyā ke ġham

ho rahā hai dil se dhīre dhīre phir koī judā

der se miltā hai jo rishtoñ ke mele meñ hameñ

jaane ho jaatā hai kyoñ ham se vahī jaldī judā

uḌ ga.iiñ murġhābiyāñ par us taraf baiThe hue

ek laḌke ko sabhī se kar ga.ī golī judā

barhamī rishtoñ kī shādī ke dinoñ meñ aam hai

jo bhī kar lo paañv se hotī nahīñ pagḌī judā

aankh se is fikr mein hota nahin pani juda

ek din ho jaegi mujh se meri beTi juda

maujib-e-furqat wahan bhi dana-e-gandum hi tha

aur aksar yan bhi hum ko karti hai roTi juda

wadi-e-dil tak nazar aaegi ek chhoTi lakir

kar rahe ho aankh se tum jis tarah pani juda

baad-o-baran ne bhi us se dil-lagi kya KHub ki

jo uDa kar le gain chhatri juda chunari juda

KHwahishon par phir musallat ho gae duniya ke gham

ho raha hai dil se dhire dhire phir koi juda

der se milta hai jo rishton ke mele mein hamein

jaane ho jata hai kyon hum se wahi jaldi juda

uD gain murghabiyan par us taraf baiThe hue

ek laDke ko sabhi se kar gai goli juda

barhami rishton ki shadi ke dinon mein aam hai

jo bhi kar lo panw se hoti nahin pagDi juda