aankh unki to kuchh aur hi kahti hai zaban aur

aañkh un kī to kuchh aur hī kahtī hai zabāñ aur

'ġhālib' kā sā un kā bhī hai andāz-e-bayāñ aur

dīvāne haiñ dekheñge unheñ dīda-e-dil se

gar ḳhud ko chhupā.eñge to hoñge vo 'ayāñ aur

jazbāt dabāoge to dard aur baḌhegā

gar aag bujhāoge to uTThegā dhuāñ aur

ai vaqt tire bas meñ nahīñ in ko miTānā

qadmoñ ke nishāñ aur haiñ zaḳhmoñ ke nishāñ aur

mahsūs ye hotā hai ki maiñ Tuut rahā huuñ

TuuTā hai mirī āñkhoñ meñ ik ḳhvāb-e-girāñ aur

tā'mīr pe tā'mīr maiñ kartā huuñ nasheman

nārāz thī nārāz huī barq-e-tapāñ aur

ye kahne lage ahl-e-junūñ ahl-e-ḳhirad se

masjid kī azaañ aur hai sahrā kī azaañ aur

mahfil meñ yahī soch ke baiThā huuñ abhī tak

mahfil se uThā terī to jā.uñgā kahāñ aur

aankh un ki to kuchh aur hi kahti hai zaban aur

'ghaalib' ka sa un ka bhi hai andaz-e-bayan aur

diwane hain dekhenge unhen dida-e-dil se

gar KHud ko chhupaenge to honge wo 'ayan aur

jazbaat dabaoge to dard aur baDhega

gar aag bujhaoge to uTThega dhuan aur

ai waqt tere bas mein nahin in ko miTana

qadmon ke nishan aur hain zaKHmon ke nishan aur

mahsus ye hota hai ki main Tut raha hun

TuTa hai meri aankhon mein ek KHwab-e-giran aur

ta'mir pe ta'mir main karta hun nasheman

naraaz thi naraaz hui barq-e-tapan aur

ye kahne lage ahl-e-junun ahl-e-KHirad se

masjid ki azan aur hai sahra ki azan aur

mahfil mein yahi soch ke baiTha hun abhi tak

mahfil se uTha teri to jaunga kahan aur