aankh un ko dekhti hai nazara kiye baghair

aañkh un ko dekhtī hai nazārā kiye baġhair

parde meñ chhup ga.e haiñ vo parda kiye baġhair

har-chand dard-e-ishq kā darmāñ nahīñ magar

bantī nahīñ hai fikr-e-mudāvā kiye baġhair

zāhid se pūchhiye ġham-e-duniyā kī azmateñ

uqbā na mil sakī ġham-e-duniyā kiye baġhair

jaate haiñ dil meñ chhoḌ ke vo jalva-e-ḳhayāl

bujhtī hai sham.a ghar meñ añdherā kiye baġhair

aksar to dil giraftagī-e-shauq kī qasam

mujh tak vo aa ga.e haiñ irāda kiye baġhair

ham ko bhī dekhnā hai ki ye munkarīn-e-ishq

kab tak raheñge terī tamannā kiye baġhair

sher-o-adab kī raah meñ hai gāmzan 'shakīl'

apne muḳhālifīn kī parvā kiye baġhair

aankh un ko dekhti hai nazara kiye baghair

parde mein chhup gae hain wo parda kiye baghair

har-chand dard-e-ishq ka darman nahin magar

banti nahin hai fikr-e-mudawa kiye baghair

zahid se puchhiye gham-e-duniya ki azmaten

uqba na mil saki gham-e-duniya kiye baghair

jate hain dil mein chhoD ke wo jalwa-e-KHayal

bujhti hai shama ghar mein andhera kiye baghair

aksar to dil giraftagi-e-shauq ki qasam

mujh tak wo aa gae hain irada kiye baghair

hum ko bhi dekhna hai ki ye munkarin-e-ishq

kab tak rahenge teri tamanna kiye baghair

sher-o-adab ki rah mein hai gamzan 'shakil'

apne muKHalifin ki parwa kiye baghair