aankhen kabhi zulfen kabhi lab dekh rahe hain

āñkheñ kabhī zulfeñ kabhī lab dekh rahe haiñ

ā.īne meñ guzrī huī shab dekh rahe haiñ

jab tak the mire sāmne āñkhoñ meñ hayā thī

jaate hue muḌ-muḌ ke vo ab dekh rahe haiñ

allāh bachā.e nigah-e-bad se kisī kī

mahfil meñ unheñ aaj to sab dekh rahe haiñ

ik ham hī nahīñ bazm meñ betāb-o-muzabzab

ham haal tumhārā bhī ajab dekh rahe haiñ

nazreñ to haiñ donoñ kī magar farq hai itnā

vo sub.h to ham zulmat-e-shab dekh rahe haiñ

mai-ḳhāne meñ mai-ḳhvār talabgār haiñ mai ke

aur ham haiñ ki un sab kī talab dekh rahe haiñ

kal nām-o-nasab 'fauq' miTāyā thā jinhoñ ne

kyoñ aaj vahī nām-o-nasab dekh rahe haiñ

aankhen kabhi zulfen kabhi lab dekh rahe hain

aaine mein guzri hui shab dekh rahe hain

jab tak the mere samne aankhon mein haya thi

jate hue muD-muD ke wo ab dekh rahe hain

allah bachae nigah-e-bad se kisi ki

mahfil mein unhen aaj to sab dekh rahe hain

ek hum hi nahin bazm mein betab-o-muzabzab

hum haal tumhaara bhi ajab dekh rahe hain

nazren to hain donon ki magar farq hai itna

wo subh to hum zulmat-e-shab dekh rahe hain

mai-KHane mein mai-KHwar talabgar hain mai ke

aur hum hain ki un sab ki talab dekh rahe hain

kal nam-o-nasab 'fauq' miTaya tha jinhon ne

kyon aaj wahi nam-o-nasab dekh rahe hain