aankhen khuli hui hain to manzar bhi aaega

āñkheñ khulī huī haiñ to manzar bhī aa.egā

kāñdhoñ pe tere sar hai to patthar bhī aa.egā

har shaam ek mas.ala ghar bhar ke vāste

bachcha ba-zid hai chāñd ko chhū kar bhī aa.egā

ik din sunūñgā apnī samā.at pe āhaTeñ

chupke se mere dil meñ koī Dar bhī aa.egā

tahrīr kar rahā hai abhī hāl-e-tishnagāñ

phir is ke baad vo sar-e-mimbar bhī aa.egā

hāthoñ meñ mere parcham-e-āġhāz-e-kār-e-ḳhair

merī hatheliyoñ pe mirā sar bhī aa.egā

maiñ kab se muntazir huuñ sar-e-rahguzār-e-shab

jaise ki koī nuur kā paikar bhī aa.egā

aankhen khuli hui hain to manzar bhi aaega

kandhon pe tere sar hai to patthar bhi aaega

har sham ek masala ghar bhar ke waste

bachcha ba-zid hai chand ko chhu kar bhi aaega

ek din sununga apni samaat pe aahaTen

chupke se mere dil mein koi Dar bhi aaega

tahrir kar raha hai abhi haal-e-tishnagan

phir is ke baad wo sar-e-mimbar bhi aaega

hathon mein mere parcham-e-aghaz-e-kar-e-KHair

meri hatheliyon pe mera sar bhi aaega

main kab se muntazir hun sar-e-rahguzar-e-shab

jaise ki koi nur ka paikar bhi aaega