aankhen khulin to KHwab ki tabir chhin gai

āñkheñ khulīñ to ḳhvāb kī ta.abīr chhin ga.ī

raqsāñ jo aa.ine meñ thī tasvīr chhin ga.ī

qadġhan hai zehn-o-fikr pe kyā shahr-yār kī

dānishvaroñ kī hurmat-e-tahrīr chhin ga.ī

har chand naaz apnī balāġhat pe thā unheñ

vaqt-e-ḳhatā pa jur.at-e-taqrīr chhin ga.ī

ab dāstān-e-ġham meñ tasalsul nahīñ rahā

lafzoñ ke tār-o-pūd kī zanjīr chhin ga.ī

bikne lage haiñ ahl-e-hunar jab se dahr meñ

dast-e-hunar se azmat-e-ta.amīr chhin ga.ī

yarqāñ-zada hai gulsitāñ ab kī bahār meñ

phūloñ kī āb-o-tāb kī tanvīr chhin ga.ī

abr-e-karam kī kaise tavaqqo kareñ 'jamīl'

harf-e-duā kī azmat-e-tāsīr chhin ga.ī

aankhen khulin to KHwab ki tabir chhin gai

raqsan jo aaine mein thi taswir chhin gai

qadghan hai zehn-o-fikr pe kya shahr-yar ki

danishwaron ki hurmat-e-tahrir chhin gai

har chand naz apni balaghat pe tha unhen

waqt-e-KHata pa jurat-e-taqrir chhin gai

ab dastan-e-gham mein tasalsul nahin raha

lafzon ke tar-o-pud ki zanjir chhin gai

bikne lage hain ahl-e-hunar jab se dahr mein

dast-e-hunar se azmat-e-tamir chhin gai

yarqan-zada hai gulsitan ab ki bahaar mein

phulon ki aab-o-tab ki tanwir chhin gai

abr-e-karam ki kaise tawaqqo karen 'jamil'

harf-e-dua ki azmat-e-tasir chhin gai